Gasolinang gawa sa Whiskey

Dahil sa sobrang paggamit ng mga tao sa krudo at nagbabadya ang pagkaubos nito, gagamitin na ang nakakalasing na alak na Whiskey bilang biofuel, ayon sa mga Scottish researcher.

Sa pamamagitan ng prosesong butanol fermentation magiging isang krudo ang Whiskey, na kayang magpatakbo ng isang kotse sa isang buong araw, ani Martin Tangney, Director ng Biofuel Research Centre ng Edinburgh Napier University.

Nagtataglay kasi ang Whiskey ng mga sangkap na ‘Pot ale’ at ‘Draff’ na mabisang pang-gawa ng butanol, isang uri ng kemikal na maaring gamitin na fuel.

Ang pinag-iba ng Whiskey sa ibang biofuel ay 30 porsiyento itong mas mataas ang output power kaysa ethanol, mas malinis, mura at simple lang ang babaguhin sa makina ng kotse upang magamit.

Pag naging matagumpay ang Whiskey bilang biofuel, magkakaroon ng magandang epekto sa merkado at sa buong mundo dahil kakaibang katangian hatid nito, dagdag ni Tangney.#30#

Eroplanong walang fuel

Isang eroplanong nakakalipad kahit na walang kargang gas, ito ang kamangha-manghang naimbento ng isang siyentipitkong Amerikano.

Sa pamamagitan lamang ng gravity pwede ng lumipad sa himpapawid ang makabagong disenyo na eroplano ni Robert D. Hunt, dating nuclear designer, imbentor at may ari sa Hunt Aviation Corp.

Hango sa malikhain isip ng pamosong Leonardo Da Vinci, ang kaunaunahang Gravity Plane ay nakakalipad sa tulong ng 2 principle ng gravity, ang buoyancy upang makalutang sa himapapawid at ang gravity acceleration, sa paglipad naman nito sa ere.

Batay ito sa Archimedes Principal na kung saan mas hinihila pababa ng gravity ang mabibigat na bagay kaysa magagaan tulad ng bubbles at lobo, na may kakayahan lumutang, ayon kay Hunt.

Binubo ng lightweight material ang pakpak ng Gravity Plane na naglalaman ng helium, kung kaya’t nakakaangat ito sa himpapawid.

Umaabot sa 100,000 feet ang kayang abutin ng eroplanong may karga na helium, at diumano, walang idudulot itong polusyon at hindi mapanganib sa pagsabog tulad ng mga hydrogen o avgas (ang karaniwang gasolina ng mga eroplano).

Balak naman nina Hunt at ng kanyang aviation company na ilipat ang teknolohiyang Gravity Plane sa mga domestic at commercial airplane, upang makatulong sa mga tao dahil sa napakamura nito kaysa sa nagagastos ng isang pangkaraniwang eroplano sa kanyang gasolina. #30#

Stress nakakabaog sa Babae

Nakakabaog sa babae ang pagkakaroon ng highlevel stress o sobrang tensyon sa katawan, batay sa mga pananaliksik ng mga doktor sa Oxford University ng US National Institute of Health.

Mahirap magbuntis ang mga babaeng palaging pagod sa trabaho, sabi ni Dr. Cecilia Pyper, isang mananaliksik sa National Perinatal Epidemiology Unit ng University of Oxford .

Sa tuwing ang tao ay may stress sa kanyang katawan, nagpapakawala ito ng sangkatutak na alpha-amylase na nagpababa sa fertility rate ng mga babae.

Nakakitaan kasi ng mga matataas na antas ng alpha amylase ang mga babaeng may stress kaya’t mahirap magkaanak.

Lumalabas kasi sa pag-aaral ng grupo ni Dr. Pyper, na 12 porsiyento lang ang tsansang magkaanak ang mga babaeng sobra ang stress.

Ngunit maiiwasan naman kung magkakaroon ang babae ng malusog na pamumuhay, umiwas sa mga bisyo tulad ng alak at sigarilyo, kumain ng masustansyang pagkain, magehersisyo at magpahinga. #30#

Pagtitig sa mga boobs ng babae nakababata

Pampabata daw ang pagtitig ng mga kalalakihan sa naggagandahang dibdib ng mga kababaihan, base sa pag-aaral ng isang doktor na lumabas sa ulat ng New England Journal of Medicine.

Ayon sa doktor, nagbibigay raw ng kasiyahan na humahantong sa magandang pagdaloy ng dugo, kapag nakakakita ang mga lalaki ng malulusog na dibdib ng mga kababaihan, ani Dr. Karen Weatherby, German gerontologist at pangunahing researcher.

Mainam sa mga lalaki ang pampagana sa katawan upang makaiwas sa mga sakit ng matatanda habang nakatingin sa magandang dibdib ng mga babae dahil gumagagana ang imahinasyon na magdudulot nang maayos na pagdaloy ng dugo at puso.

Sampung minuto lang ang kinakailangan na pagtutok ng mga lalaki sa dibdib at halos katumbas na nito ang 30 minutong pag-ehersisyo sa isang gym.

Dagdag pa ni Dr. Weatherby, ang mga lalaking palaging tumitingin sa mga dibdib na babae ay may mababang blood pressure, mahinahong pulso at malusog na puso.

Umabot sa limang taon ang pag-aaral ng doctor sa 200 lalaking nahikayat upang sumali sa isang pagsusuri upang matukoy kung pampabata ang pagtitig sa mga malulusog na dibdib ng mga babae.

Paalala naman ni Dr. Weatherby, hindi raw ito isang biro at huwag lamang sobrahan ang pagtingin sa dibdib ng mga babae dahil masama kahihinatnan kapag nasobrohan. #30#

Toronto News

‘Online gambling’ bubuksan sa Ontario , referendum hirit

TORONTO – Magbubukas ng online gambling ang Ontario pagsapit ng taon 2012, ayon kay Finance Minister Dwight Duncan kamakailan.

Pahayag ng opisyal, kapag natuloy ang gambling online, makalilikom nang humigit-kumulang $100 milyon bawat taon ang lalawigan.

Sa palagay ng Ontario Lottery and Gaming Corp., tinatayang aabot sa $1 billion bawat taon ang nagagastos ng mga Canadian sa mga “unregulated gambling site” at nais bigyan ito ng agarang aksyon.
Samantala, dapat munang pigilan ng Ontario ang online gambling websites at magdaos muna ng referendum na isasama sa halalan ng probinsiya sa 2011, ayon kay Ken Lewenza, presidente ng Canadian Auto Workers. #30#

‘Library vending machine’ sa Toronto pinag-iisipan

TORONTO – Naghahanap ang Toronto Public Library ng mga paraan upang makapaglagay ng mga “automated kiosk” na namamahagi ng mga aklat sa pinaka-abalang transit facility sa Canada .

Sa tantiya ni Anne Bailey, direktor ng mga branch library ng TPL, maaaring magkakaroon na ng “kiosk” sa Union Station pagsapit sa taon 2012. Tinatayang aabot sa 200,000 katao ang tumatangkilik sa istasyon araw-araw.

Magiging parang “vending machine” ang itsura ng “kiosk.” Ang mga hihiram ay gagamit ng “touchscreen” upang pumili ng mga libro, CD o DVD.

Pagkatapos, pwede nang “”i-swipe” ang kanilang library cards sa mga bagay na nais nilang hiramin at isasauli sa “kiosk” bago sumapit sa nakatakdang araw ng sulian. #30#

Bagong ‘curriculum’ ipatutupad sa Ontario

ONTARIO – Magkakaroon ng bagong kurikulum sa mga high school ng Ontario sa darating na Oktubre.

Ang ilang sa mga masinsinang tatalakayin sa bagong kurikulum ay bullying, cyber stalking, drug abuse at defibrillators.

Pinaplantsa na ng mga opisyal sa pamahalaan ang mga pagbabago sa health at physical education curriculum sa probinsiya na walang nabago mula taong 1998.

Ayon sa tagapagsalita ni Education Minister Leona Dombrowsky, humigit-kumulang 90 porsiyento ng health at physical education curriculum ang magiging pabor sa mga estudyante. #30#

Bulk-buy drug program napagkasunduan

Kumikilos ang mga premier at territorial leaders sa Canada upang maitatag ang pan-Canadian purchasing alliance at makabili ng maramihang gamot, medical supply at gamit.

Sa tauhan miting ng Council of the Federation sa Winnipeg , sinabi ni Manitoba premier Greg Selinger, dapat ang mga lalawigan ay humanap ng mga paraan upang mapabuti ang “health-care services” sa kanilang sinasakupan.

Hinimok din ng premier na kausapin ang Federal upang alisin ang mandatory long-form census.

Plano rin ng mga ibang probinsiya na maglagay ng mas maraming leverage sa federal upang makakuha ng mas maraming pondo para sa health care. #30#

29 huli, $5.8-M droga nasamsam sa Toronto

TORONTO – Mahigit $5.8-milyong halaga ng mga ipinagbabawal na droga ang nasamsam ng mga pulis at 29 katao ang arestado dahil sa kasong drug trafficking at operation sa Toronto kamakailan.

Ayon sa pulisya, kabilang sa mga nahuli ay painkiller na ketamine na nagkakahalaga nang $5.2 milyon na pinaniniwalaan kumakalat sa mga lansangan ng Greater Toronto Area.

Ang pagkasamsam ng mga droga at pag-aresto sa mga suspek ay resulta ng tatlong-buwang pagsisiyasat na isinagawa ng mga alagad ng batas sa Peel, Toronto at York , kasama na ang Canada Border Service Agency.

Ilang ding baril, mga bala at ilang paris ng nunchuks (tsako) ang nakumpiska sa operasyon. #30#

McGuinty: LHINs mas maraming magagawa

ONTARIO – Mahalaga ang Local Health Integration Networks (LHINs) sa Ontario upang makakuha ng local input sa mga peligrosong desisyon sa health care at dapat paigtingin ang konsultasyon sa mga komunidad, ayon kay Premier Dalton McGuinty.

Itinatag ng pamahalaan ng Liberal ang 14 na ahensiya noong 2007 upang makapagbigay ng $12.5 bilyon health funds bawat taon sa mga ospital, klinika, community care at long-term homes.

Ani McGuinty, kasalukuyan pang binabalangkas ang mga alituntunin upang mas lalong mapabuti ang LHINs. #30#


Nawawalang files ng mga pasyente tinuligsa

ONTARIO – Nagngingitngit sa galit ang hepe ng Ontario’s privacy watchdog matapos lumabas sa mga ulat na ang files ng ilang daang pasyente sa Toronto na nakaimbak sa computer memory stick ay nawawala.

Kamakailan, sumulat ang University Health Network sa 763 pasyente na sumailalim sa operasyon sa isa sa kanilang tatlong ospital sa pagitan ng Enero at Marso nitong taon at sinasabihan na ang kanilang mga medical information ay nanakaw.

Ang ilan sa kanilang files ay kinopya sa isang unencrypted USB key, na nawala sa pitaka sa isang kawani ng ospital noong Hunyo 18 at hindi pa ito nahahanap hanggang sa kasalukuyan.

Hindi naman nakalagay sa files ang OHIP numbers, addresses at ibang mga contact information ng mga pasyente, kasama ang pangalan, admission at discharge dates, at surgical procedures ng mga pasyente. #30#

23-anyos kinasuhan sa pananakit sa GF at aso

ONTARIO – Nahaharap ngayon ang isang 23-anyos na lalaki ng mga kasong assault at animal cruelty matapos umanong saktan ang kanyang kasintahan at alagang aso.

Ayon sa ulat, rumesponde ang pulisya sa Talbot St. sa Bleheim matapos tumawag ng saklolo ang isang babae nang bigla na lamang pinagpapalo ang alagang aso ng lasing na boyfriend sa labas ng kanilang tahanan.

Sinabi ng babae na pinapasok niya ang aso sa loob ng bahay at sinubukan niyang awatin ang boyfriend sa patuloy na pananakit, ngunit siya ang napagbalingan ng galit at pinagsusuntok nang maraming beses sa mukha.

Habang winawasak ng boyfriend ang kanilang ari-arian sa loob ng bahay ng nakatawag sa pulisya ang babaeng biktima. Nasa kulungan ngayon ang lalalki habang hinihintay ang kanyang bail hearing. #30#

Homeless, mga opisyal naghahanda na sa summer

ONTARIO – Naghahanda na ang mga residente sa Tent City upang dumagsa sa mga local pool at takasan ang tag-init na aabot ang tagal sa halos isang buwan.

Ayon sa ulat, naghahanap ng mga naninirahan sa Temporary Homeless Services ng mga malamig na lugar upang maibsan ang mararamdamang init.

Paliwanag ni Brent Schultz, director sa Housing and Neighborhood Revitalization for Ontario , sinimulan na ng pamahalaan na palitan ang mga tolda tuwing tatlong buwan mula nang kunin ang pamamahala sa Tent City .

Dagdag pa ni Schultz, wala siyang nababalitaan mga nagpupuntang paramedics sa Tent City upang rumesponde sa mga insidente na may kinalaman sa klima dahil malala ang panahon sa tuwing tag-araw dito. #30#

Pagbebenta ng GM stakes wala pang pasiya

TORONTO – Wala pang desisyon ang Ottawa kung sakaling maglalagay ng puhunan sa shares ng initial public offering ng General Motor Corps, ayon kay Jim Flaherty, federal finance minister.

Masaya naman si Flahery sa US $1.33-billion second-quarter profit na natanggap galing sa automaker noong Agosto 12

Sa pagtanggi ng GM, napatunayan na tama ang Ottawa sa paglalagak ng bilyones na pera ng mga mamamayan upang iligtas sa bangkarote ang kumpanya noong kasagsagan ng krisis sa ekonomiya sa taong 2008.

Masusi naman pinag-uusapan nina Flahery at opisyales ng GM ang planong maglagay sa initial public offering. #30#

Halaga ng Port Lands arena aabot sa $88M

TORONTO – Ang makabagong complex na tinatampukan ng four rinks na nakasalansan sa taas ng bawat isa sa east waterfront ay magkakahalaga ng $88 million, halos $54 million higit sa orihinal na pondo na inilaan sa proyekto, ayon sa report.

Inirekomenda ng lungsod na ituloy ang pagpapatayo ng isang complex, kahit na inaasahan na mura lang ang pagpapagawa nito.

Sa kasalukuyan, umaabot lang sa $34 million ang pondong inilaan ng Federal sa pagpapatayo ng gusali sa bahagi ng Commissioner St. malapit sa Don Broadway.

Naniniwala ang lungsod na aabot sa $21-$25 milyon ang malilikom mula sa utang na kanilang babayaran sa loob ng 30 taon. #30#

Mixed martial arts OK na sa Ontario

ONTARIO - Nagbago ang pasya ng pamahalaang Ontario na payagan ang pagdadaos ng mga torneyo sa larong “mixed martial arts (MMA)” umpisa sa taon 2011.

Noon, tutol si Premier Dalton McGuinty sa larong MMA dahil walang puwang daw sa probinsya ang bayolenteng “bare-knuckled cage matches” at hindi ito bagay sa mga mamayan ng Ontario.

Ani Sophia Aggelonitis, consumer services minister, ang pinakamagandang paraan upang mapangalagaan ang mga atleta ng MMA ay laanan sila ng ganap na atensyon lalo na tuwing may laro.

Walang babaguhin sa mga batas at regulasyon ng MMA, ang mangangasiwa lang bawat paligsahan ay ang Ontario Athletic Commission na nagbabantay sa mga larong boksing. #30#

Kaso inilatag sa bumagsak na scaffolding sa Xmas eve

ONTARIO – Samut-saring kaso ang isinampa ng Ontario Ministry of Labor sa dalawang kumpanya dahil sa aksidenteng pagkasawi ng apat na migrant workers noong nakaraang taon bisperas ng Pasko.

Natatandaan limang katao ang nalaglag mula sa ika-13 palapag hanggang sa ground floor, habang kinumkumpuni nila ang isang apartment sa Toronto .

Apat sa kanila ang namatay agad at ang isa naman ay himalang nabuhay na nabalian lamang ng dalawang paa at gulugud (spine).

Matapos ang imbestigasyon ng Ministry of Labor, sinampahan ng 61 kaso ang dalawang kumpanyang naupahan upang ayusin ang gusali.

Meron 30 kaso ang Metro Construction Corp.; 16 dito sa kanilang director at 8 sa tagapangasiwa. Kinasuhan rin ng apat ang Swing ‘N’ Scaff Inc., platform supplier, at ang director na tatlong kaso.#30#

Labor deal OK na sa mga Toronto rail workers

TORONTO – Nagkasundo ang Canadian Auto Workers at Toronto Terminals Railway sa pagtataas ng sahod sa loob ng tatlong taon sa mga manggagawa, matapos ang magbanta na magdaos ng isang malawakang welga.

Usapan ng dawalang hanay ay itataas ang sahod ng mga manggagawa sa loob ng tatlong taon kasama ang ilang benepisyo pangkalusugan katulad ng dental at eye care.


Isa rin sa mga napagkasunduan ay ang mabilis na pagkuha ng mga retirement benefits sa mga retiradong manggagawa.

Ayon sa union nararapat lang na napakinggan ang hinaing ng mga manggawa dahil sa matagal na nilang idinudulog ang omento sa sahod. #30#

‘Exchange scam’ sa mga Tsino sinisiyasat

TORONTO – Masusing iniimbestigahan ng mga Toronto pulis ang dalawang insidente nang pangloloko sa pera at binalaan ang mga Tsino na magingat dahil sila ang puntirya ng mga kawatan.

Base sa rekord ng pulisya, sa magkahiwalay na lugar, nanakawan ang dalawang Tsino ng daang-libong dolyar matapos linlangin ng isang lalaki sa pamamagitan ng bogus currency exchange service.

Ang modus operandi ng kriminal ay manginganyo ng mga dayuhang Tsino na magpapalit ng kanilang Chinese yuan sa Canadian dollar sa mas mataas na palit ngunit hindi naman nasusunod sa halip naitatakbo ang pera.

Tugma ang estilo ng panloloko ayon sa unang biktima na 45-anyos na nawalan ng CAN$200,000 at ang pangalawa naman na 33-anyos na $400,000 ang natangay.

Pinaghahanap naman ng mga alagad ng batas ang suspek na nasa higit 40-anyos, 5’7” at 5’9” ang taas, 180 lbs maiksi at itim ang buhok at marunong ng magsalita ng Cantonese at Mandarin. #30#

CANADIAN BRIEFS

5 generic products na pareho sa branded products

Dahil sa resesyon, karamihan ng mga namimili ay nagtitipid sa pamamagitan ng pagpili sa mga generic product kaysa branded products. Halos kahat ng produkto ay meron generics at di-hamak na mas mura. Pero, kailangan alamin kung kailan bumili ng generics.

Mga produktong pwedeng ng “generic versions:”

Cereal: Okey lang bumili ng generic brand na cereal. Gayunpaman, marami mga namimili ang nagsasabi, na ang generic cereal ay halos kapareho sa kanilang brand name counterparts. Tulad na lamang sa isang 14-ounce box na branded corn flakes na ang presyo ay umaabot sa $2.99, habang ang generic corn flakes ay 99 cents. Kung may pag-alinlangan, suriin ang label ng brand product at ikumpara sa mga sangkap ng generics. Matutuklasan na ang sangkap ay halos parehas. Sa madaling salita, nagbabayad ng extrang halaga para sa corporate mascot.

Prescription: Kung nais makatipid ng malaking halaga ng pera sa mga prescription drug, bumili ang generics dahil mas mababa ang halaga ng 20%-80%, kumpara sa branded medicines. Noon 2008, ang retail price ng branded prescription ay $137.90 kumpara sa generic prescription na $35.22. Karamihan ng mga namimili ay nangangamba na baka hindi ligtas ang generic prescriptions. Ngunit, ang pharmaceutical companies ay gumagamit ng mga parehong sangkap ng mga gamot na ginagawa ng mga branded companies.

Over-the-Counter Medicines: Tulad ng mga prescription drug, malaki rin ang matitipid sa over-the-counter meds, kung generics ang pipiliin. Tulad nang pagbili ng Tylenol, Nyquil o Zantac, may mga murang gamot sa over-the-counter na nagtataglay na parehong sangkap at aprubado ng Food Drug Administration.

Basic Baking Products: Kung nais magimbak ng mga baking basics sa paminggalan, piliin ang generic versions. Tulad ng arina, butter, spices, asin at asukal, ang mga generic baking staples ay halos pareho sa mga branded. Ang mga pagawaan ng generics single-ingredients ay kailangan sumunod sa regulasyon sa paggawa at pagimbak katulad ng mga branded company.

Fresh Fruits and Veggies: Maaring isipin ang mga prutas at gulay na makikita sa mga malalaking supermarket ay mas maraming bitaminang at mas ligtas kainin dahil ginamitan ng makabagong teknolihiya. Pero, lumalabas na ang mga prutas at gulay na “locally produce” ay kasing-ganda kaysa mga branded at mas mura pa ang presyo. #30#

Sino sa kambal ang ikukulong?

Sobrang naguguluhan ngayon ang mga prosecutor sa New York dahil hindi nila alam kung sino sa kambal ang may sala sa isang naganap na krimen.

Ang magkakambal ay sina Edward at Raymond Nicken, 31-anyos, ay magkasama ngayon sa iisang piitan matapos ireklamo ang isa sa kanila nang pamamaril.

Naituro nang mabuti ang mga saksi na isa sa kambal ang may kasalanan ngunit ang problema kung sino sa kanila dahil pareho kasing manamit, mukha, pananalita at galaw.

Pero wala rin silbi matapos makaisip ang mga prosecutor na kunan ng litrato ang akusadong kambal na nakadamit at nakahubad upang matukoy kung sino ang may sala dahil halos magkapareholang ang dalawa. #30#

Sugalerong nanalo premyo di nakuha

AUCKLAND, New Zealand – Laking pagsisi sa sarili ang isang sugalero matapos manalo sa plarong poker ng $44,000 ngunit hindi binigay dahil ipinagbawal ang sarili na magsugal sa casino.

Halos tulala si Sothea Sinn, 28-anyos, matapos manalo sa Caribbean poker game sa SkyCity Casino, ngunit hindi ibinigay ang premyo dahil bawal pala siya nang mismong ipagbawal ang sarili na magsugal dito.

Pera na naging bato pa ang tanging namutaw sa bibig ni Sinn dahilnakalimutan na niya noong 2004, sa sobrang pagkahumaling sa sugal, mismo ipinagbawal ang sarili na maglaro sa SkyCity Casino.

Matapos manalo, napag-alaman ng mga casino personnel na banned pala siyang maglaro sa SkyCity, kaya walang silbi ang pagkapanalo niya.

Tangka naman ni Sinn na magsampa ng kaso laban sa SkyCity sa korte sa hindi pagbigay ng premyo niya. #30#

Halaman tumubo sa baga ng isang guro

Massachusetts, USA – Isang matandang lalaki ang inakalang may sakit na kanser sa baga, pero ang inaasahang tumor ay isang halaman na tumubo sa kanyang katawan.

Si Rom Sveden, 75-anyos, isang retiradong guro ay isinugod sa ospital matapos makaramdam ng kakapusan sa paghinga at pananakit sa baga.

Matapos ang ilang beses na pagsusuri ng mga doctor ang baga ni Sveden, nagulat sila sa kanilang natuklasan.

Sa halip na tumor ang nakita, sa tulong ng X-ray, nadiskubre nila ang isang halaman ang tumutubo sa baga ni Sveden.

Isang halamn na pea na may laking 12mm o 0.5 pulgada ang nakabaon at buhay sa loob nang katawan ng naturang propesor.

Natuklasan ng mga doktor, nagmula ang halaman sa pagkain ng pea beans at nagkamali ng pagpasok matapos lunukin at sa baga dumiretso sa halip na sa tiyan.

Pero, laki pa rin ang pasasalmat ni Sveden dahil hindi daw kanser ang nakita kundi halaman mula sa araw-araw na pagkain ng pea beans. #30#

Pagkalat ng nakamamatay na super bug babala

Nagbabala ang mga siyentipiko ang posibleng pagkalat nang mas mapanganib at nakamamatay na sakit na dulot ng super bug.

Mula sa tawag sa New Delhi na metallo-lactamase-1 NDM-1 o Super Bug, ang naturang virus ay higit pang mas malakas kaysa HN-1 at Ebola virus.

Walang lunas ang kahit anumang klase gamot, vitamins at kasama na ang antibiotic, sa bagsik ng super bug, ayon kay Timothy Waish, pangunahing researcher sa virus.

Wala ring pinipiling lugar ang super bug, kaya nitong mabuhay sa malamig at mainit na lugar, ns umaabot na sa Europa at US ang mga taong naapektuhan ng virus.

Naiulat na meron ng super bug sa Great Britain at tatlo naman sa US , lahat ng mga pasyente ay diumano nagpunta o dumaan sa bansa ng India .

Sintomas ng super bug ay mataas na lagnat na may kasamang urinary tract infection, bacteremia o pneumonia, papahirapan ang maysakit hanggang mamatay.

Nakakatakot kung sakali magkaroon ng world outbreak dahil walang makakapigil sa tindi ng virus ng super bug at wala pang lunas ang nadiskubre at hindi pa tukoy ang pinangalingan ng bacteria.

Ang tangi na lamang paraan upang mapigilan ang paglaganap ng super bug ay ang pagsunod sa katagang “prevention is better than cure,” maging malinis sa kapaligiran at sa katawan at ang mga nagkasakit ay ilagay lamang sa iisang lugar.

Binigyan naman ng travel advisory ang mga tao na iwasan munang pumunta sa bansang India lalo na sa New Delhi , dahil laganap ang super bug dito.

Sinusubukan naman ang mga bihasang siyentipiko sa buong mundo na makagawa sa lalong madaling panahon ng Kryptonite antibiotic upang malabanan ang super bug bacteria. #30#

Alkohol mabisa sa rayuma

Alam nyo ba na ang pag-inom ng alkohol tulad ng alak at serbesa ay nakababawas nang rheumatoid arthritis o rayuma, ayon kay Gerry Wilson, isang professor ng Rheumatology ng University of Sheffield ng England.

Sa ginawang pag-aaral, lumalabas na ang umiinom ng alkohol ay malulusog ang mga dugtungan ng mga buto (joints) at daluyan ng mga dugo kaya’t di nagkakaroon ng rayuma, kaysa sa mga taong hindi umiinom at tumataas ang posibilidad na mananakit ang kanilang kasukasuan.

Ikinumpara ng mga researcher ang 873 pasyenteng may rheumatoid arthristis sa 1004 taong walang sintomas ng rayuma, tinanong kung umiinom ng alak, kinuhanan ng x-ray, blood test samples at sinuri ang kanilang mga dugtungan ng buto.

Lumabas sa pag-aaral, nakitaan ang mga hindi umiinon na apat na beses nagkakaroon ng rayuma kumpara sa mga taong umiinon ng alak sa loob ng mahigit 10 beses sa loob ng isang buwan.

Nadiskubre ng mga researcher na umiinom ng alak ng isang anti-cyclic citrullinated peptide (CCP) o anti-CCP antibodies sa mga walang rayuma, paliwanag ni Dr. James Maxwell, bihasa sa Rheumatoid Arthristis ng Rotherham Foundation NHS Trust.

Napagalaman ng mga researcher na ng Anti-CCP antibodies ay meron sa dugo ng mga taong may sintomas ng rayuma sa tuwing nagpapasuri sa doktor.

Subalit wala pang ganap na ebidensiya kung bakit ang alkohol ay mabisang pangtangal ng rayuma, ang pagaaral na ito’y hindi pa ganap at meron limistasyon.

Tugon ni Dr. Maxwell, na kulang pa ang pag-aaral upang patunayan mabisa ang alkohol sa rayuma at hindi matukoy ng mga dalubhasa kung gaano kadalas uminom ng alak, ilang beses sa isang araw, anong klaseng alak ang iinumin at klase ng buhay mayron sa mga taong walang rayuma. #30#

Resibo delikado sa tao

Mahalaga ang resibo kapag bumili ng mga bagay sa mga pamilihan. Dito malaman ang halaga ng mga bagay ng nabili. Pero, ingat lang dahil ang resibo o cash register ay nagtataglay pala ng lason at nakasasama sa kalusugan ng tao.

Kamakailan, natuklasan nina John Warner, isang chemist at lider ng Warner Babcock Institute for Green Chemistry at mga kasama na ang resibo o cash register nakalalason pala sa tao matapos magsagawa ng ilang eksperimento.

Sa kanilang pagsusuri, ang resibo kasi ay nagtataglay ng kemikal na Bisphenol A, na galing sa mga receipt printer machine na madalas ginagamit sa mga supermarket, convenient store, fast food, gas station at ATM machine.

Ang Bisphenol A ay isang uri ng delikadong kemikal na kung masobrahan nang pagkalantad, pwedeng magkasakit sa puso. At sa mga bata naman nagkakaroon ng problema sa pag-iisip at nagiging obese at para sa mga buntis ay magkaroon ng metabollica disease.

Isang pangunahing sankap ang Bispenol A sa paggawa ng mga papel na inilalagay sa loob ng isang receipt printer, ang kemikal na ito ang tumutulong sa tinta ng receipt printer upang dumikit ang kulay tuwing ginagawa ang mga resibo.

Sa resulta ng experimento, sa 10 resibo nakolekta sa lugar ng Boston, walo ang positibo sa Bisphenol A, anim dito ang may 1.09% hanggang 1.70% Bisphenol A, dalawang natitira ay nakitaan nang .30% at .83% Bisphenol A.

Dagdag pa ni Koni Grob, co-author ng pag-aaral, madaling dumikit ang Bisphenol A sa balat ng tao lalo na kung basa at hindi madaling hugasan.

Sa ginawang eksperimento ni Grob, walang epekto kahit pahiran nang ethanol alcohol upang tanggalin ang Bisphenol A, bagkus ay pumapasok ang kemikal sa loob ng daluyan ng dugo.

Dipensa naman ni Warner, matagal na pagkalantad ang kinakailangan bago maging mapanganib sa tao ang Bisphenol A at ang isa hindi naman palaging hinahawakan ng tao ang mga resibo. #30#